މި ހަމަނުޖެހުމަކީ އެމްޑީޕީގެ ބަޔަކު ތައްޔާރުވެގެން ގަލާއި ލަޓިބުރި ފަދަ ތަކެތި ހިފައިގެން އައިސް ދިން ހަމަލާއެއް- މައުމޫން
މިދިޔަ ހުކުރުދުވަހު ޑީއާރުޕީގެ ޒައީމް، ކުރީގެ ރައީސް މައުމޫން އަބްދުލް ގައްޔޫމާއި، ޑީއާރުޕީގެ ބައެއް އިސްބޭފުޅުން ކާޑެއްދޫއަށް ވަޑައިގަތުމުން ކާޑެއްދޫއިން އެމްޑީޕީގެ ބަޔަކު ރާވައިގެން ދިން ހަމަލާއަކީ މީގެކުރިން ދުވަހަކުވެސް ރައީސް މައުމޫން ރާއްޖޭގެ އެކި އަތޮޅުތަކަށް ކުރެއްވި ދަތުރުފުޅުތަކުގައިވެސް އެމަނިކުފާނު ދެކެވަޑައި ނުގަންނަވާ ފަދަ ބޮޑު ހަމަނުޖެހުމެއް ކަމަށާއި، މިހަމަނުޖެހުމަކީ އެމްޑީޕީގެ ބަޔަކު ރާވައިގެން ދިން ހަމަލާއެއްކަމަށް ޒައީމް މައުމޫން އަބްދުލް ގައްޔޫމް ވިދާޅުވެއްޖެއެވެ.ކުރީގެ ރައީސް ޑީއާރުޕީގެ ޒައީމް މައުމޫން އަބްދުލް ގައްޔޫމް ވިދާޅުވީ މިހަމަނުޖެހުމަކީ އެމްޑީޕީގެ ބަޔަކު ވަރަށްބޮޑަށް ރާވައި، ތައްޔާރުވެގެން ގަލާއި، ލަޓިބުރިފަދަ ތަކެތި ހިފައިގެން ކާޑެއްދޫއަށް ގޮސްގެން ޑީއާރުޕީގެ މެންބަރުންނަށާއި، ޕާޓީގެ އިސްބޭފުޅުންގެ އިތުރުން އެމަނިކުފާނަށް ދިން ހަމަލާއެއް ކަމަށެވެ.
އަދި މިހަމަނުޖެހުމުގައި ޑީއާރުޕީގެ ކުރީގެ ޑެޕިއުޓީ ލީޑަރ އުމަރު ނަސީރަށާއި، ޒުވާނުންގެ ގޮފީގެ ރައީސް އަހުމަދު މަހްލޫފަށް ހަމަލާދީ ޒަޚަމްކޮށްލާފައިވާ ކަމަށް މައުމޫން ވިދާޅުވިއެވެ. އެމަނިކުފާނު ވިދާޅުވީ މިފަދަ ހަމަނުޖެހުންތަކުގެ ސަބަބުން އެމަނިކުފާނުގެ އަޒުމަކަށް ކުރައްވަމުން ގެންދަވާ މަސައްކަތްފުޅަށް އެއްވެސް ހުއްޓުމެއް ނާންނާނެކަމަށާއި، އަދި ކުޑަކޮށްވެސް ޖެހިލުންވެ ވަޑައި ނުގަންނަވާކަމަށް މައުމޫން ވިދާޅުވިއެވެ.
” މިކަމަކީ ހިނގައިގެންވާނެ ކަމެއްނޫން. އަޅުގަނޑު ހިނގައްޖައިން ރާއްޖޭގެ އެކި އަތޮޅުތަކުގެ ވަރަށް ގިނަ ރަށްރަށަށް. މިހާތަނަށް އަޅުގަނޑުދިޔަ އެއްވެސް ރަށަކުން މިހާބޮޑު ހަމަނުޖެހުމެއް ނުދެކެން. އެއްވެސް ތާކުން މިކަހަލަ މަންޒަރެއް ނުފެނޭ. މިހަމަލާއަކީ އެމްޑީޕީގެ ބަޔަކު ގަލާއި، ލަޓިބުރިއާއި އެހެނިހެންފަދަ ތަކެތި ހިފައިގެން ރާވައިގެން އައިސްދިން ހަމަލާއެއް. މިގޮތަށް އަޅުގަނޑަށް ދޭ ހަމަލާއަކުން އަޅުގަނޑު ކުރަމުންދާ މަސައްކަތެއް ހުއްޓައެއް ނުލާނަން. އަޅުގަނޑަކީ މިކަހަލަ ކަމަކަށް ބިރުން ފަހަތައް ޖެހޭނެ މީހެއްނޫން.” މައުމޫން ވިދާޅުވިއެވެ.
ޒައީމް މައުމޫން ވިދާޅުވީ މީގެކުރިން އެމަނިކުފާނުވަނީ މިއަށްވުރެ ބޮޑެތި ކަންތައްތަކާއި ކުރިމަތިލައްވާފައި ކަމަށާއި، މިއަކީ އަދި އެއްވެސް ކަމެއްނޫންކަމަށެވެ.
No comments:
Post a Comment