އެމްއެންބީސީން ގެނެސްދިން ވޮއިސްއޮފް މޯލްޑިވްސްގައި ބައިވެރިވުމާއި ހަމައަށްވެސް ލަވަކިޔަމުން ދިޔައީ އާއިލާއަށްވެސް ” ވަގަށް” ފިލާއިނދެގެންކަމަށް ޚާލިދު ބުނެފިއެވެ.އެމްއެންބީސީން ”ވޮއިސްއޮފް މޯލްޑިވްސް” ގެ ނަމުގައި ހުޅުވާލި ލަވަމުބާރާތުގެ ފަޚްރު ވެރި އެއްވަނަ ހާސިލް ކުރި ޅ. ނައިފަރު ލޯޖެހިމާގެ އުމުރުން 20 އަހަރުގެ މުހައްމަދު ޚާލިދު މިއަދުނޫހަށް މައުލޫމާތު ދެމުން ބުނެފައިވަނީ މިއީ އޭނާ ލަވަ މުބާރާތެއްގައި ބައިވެރިވި ފުރަތަމަ ފަހަރު ކަމަށާއި، މީގެކުރިން އޭނާ ލަވަ ކިޔަމުންދިޔައީ އާއިލާގެ މީހުންނަށްވެސް ވަގަށް ފިލާ އިނދެގެން ކަމަށެވެ.
އެންމެ ކުޑައިރުންސުރެ އާއިލާއަށް ވަގަށް ސިއްރުން ފިލާއިނދެގެން ލަވަކިޔަމުން ދިޔަ ޚާލިދު ބުނީ އޭނާ މީހުންނަށް އަޑު އިވޭ ހިސާބުގައި މީގެ ކުރިން ލަވަނުކިޔަނީ މަންމަމެންވެސް ފާޑު ކިޔާނެތީއާއި، ލަދުން ކަމަށެވެ. އަބަދުވެސް ލަވަކިޔުމަށް ޝައުގުވެރިކަން ހުންނަކަމަށާއި، އެދާއިރާއިން ކުރިއަށް ދިއުމަށް ކުރިންވެސް ވިސްނަމުން ދިޔަ ކަމަށް ޚާލިދު ބުންޏެވެ.
މަޝްހޫރު ލަވަކިޔުންތެރިޔާ ނައިފަރު ދޮހޮއްކޮއާއި ބައްޕަގެ ފަރާތުން އާއިލީ ގުޅުމެއް އޮންނަ ޚާލިދު ބުނީ މިމުބާރާތުން އެއްވަނަ ލިބިދާނެ ކަމަށް އެއްގޮތަކަށްވެސް ކުރިން ހީކޮށްފައި ނުވާކަމަށާއި، މުބާރާތުގައި އޭނާއާއި ވާދަކުރި ކުދިންނަކީވެސް ވަރަށް މޮޅުކުދިން ކަމަށެވެ. ނަމަވެސް އެންމެ ފަހު ވަގުތު ނަތީޖާ އިއުލާންކުރުމުގެ ކުރިން އޭނާއަށް އެއްވަނަ ލިބިދާނެ ކަމަށް ވަރަށް ބޮޑަށް އުންމީދު ކުރެވުނު ކަމަށް ޚާލިދު ބުންޏެވެ.
ވަރަށް އުފަލުން އިނދެ ޚާލިދު ބުނީ މުބާރާތުގެ އެންމެ ފަހު ރެއާއި ހަމައަށްވެސް ކޮންމެ ރެއަކު، އަދި ޚާއްސަކޮށް އެއްވަނަ އިއުލާންކުރި ވަގުތުވެސް އިއްބެއާއި، ލީޒާ ދައްކަމުންދާ ވާހަކަތަކުން މީހާއަށް ވަރަށް ބޮޑު ހާސްކަމެއް ލިބެމުންދާ ކަމަށާއި، ކޮންމެ ރެއަކުވެސް ތައުރީފް ކުރަންފެއްޓުމުން ކަޓަން އުޅޭކަހަލަ އިހްސާސްތަކެއް ކުރެވި ބިރު ގަންނަ ކަމަށެވެ. އަދި އެއްވަނަ އިއުލާންކުރުމުގެ ކުރިންވެސް އިއްބެއާއި ލީޒާގެ ވާހަކަތައް އަޑުއަހާފަ ވަރަށް ބިރުގަނެ ހާސްވާގޮތް ވިކަމަށް އޭނާ ބުނެފައިވެއެވެ.
ސްޓޭޖްގައި ހުރެގެންވެސް އެންމެ ފަހުވަގުތުވެސް އެއްވެސް މީހަކު ދެރަނުވުމަށާއި، ކެތްކުރުމަށް އާއިލާގެ މީހުންނާއި ރައްޓެހިންގެ ގާތު އިޝާރާތުން ބުނަމުން ދިޔަކަމަށް ޚާލިދު ބުންޏެވެ.
ބޭންކް އެކައުންޓެއް ހުޅުވުމަށްފަހު އެންމެ ފުރަތަމަ މިނޫހަށް މައުލޫމާތު ދެމުން ޚާލިދު ބުނީ އޭނާއަށް ފައިސާގެ ގޮތުގައި ލިބުނު އެއްލައްކަ ރުފިޔާއާއި، އަގުހުރި މުދާ ބޭނުންކުރާނީ އަމިއްލަ ރަގަޅު ދިރިއުޅުމެއް ފެށުމަށް ކަމަށާއި، މިއީ އޭނާގެ ފެށުންކަމަށެވެ. އަދި ކުރިއަށް އޮތް ތަނުގައި މިދާއިރާއިން ކުރިއަށް ދާއިރު އިތުރަށް ކިޔަވަންވެސް ބޭނުންވާ ކަމަށާއި، ވަޒީފާވެސް އަދާކުރަން ބޭނުންކަމަށެވެ. ލަވަކިޔުމުގެ ދާއިރާއިން ކުރިއަށް ދިއުމަށް ލިބުނު ފުރުސަތުގެ ބޭނުން އެންމެ ފުރިހަމައަށް ހިފާނެކަމަށާއި، މިހާރުވެސް ވަރަށް ގިނަ ފުރުސަތުތައް ލިބިފައިވާ ކަމަށް އޭނާ ވަނީ ބުނެފައެވެ.
ލަވަ ކިޔުމުގެ ދާއިރާއިން ކުރިއަށް ދިއުމަކީ އެހާ ފަސޭހަ ކަމެއް ނޫންކަމަށް ބުނަމުން ޚާލިދު ބުނީ މިދާއިރާއިން ކުރިއަށް ދާން ބޭނުންވާ ކުދިން ހިތްވަރާއެކު ކެރިގެން މަސައްކަތް ކޮށްފިނަމަ، ރަގަޅު ނަތީޖާއަކާއި ހަމައަށް ދެވިދާނެކަމަށެވެ.
ފައިނަލާއި ހަމއަށް ގެނެސްދިނުމަށް މަސައްކަތް ކޮށްދިން ހުރިހާ ފާރާތްތަކަށް ޝުކުރު ދަންނަވަމުން އޭނާ ބުނީ ކޯޗް ހުސެއިން އަލީ އަށާއި، ލަވަ ހެއްދެވި އަލީ ރިޒާއަށާއި، އެމްއެންބީސީއާއި، ޖަޖުންނާއި، ރާއްޖޭގެ ރައްޔިތުންނަށާއި، އެސްއެމްއެސް ކޮށްދެއްވި ހުރިހާ ބޭފުޅުންގެ އިތުރުން ނައިފަރާއި، ލ. މާވަށް، އަދި ހޮޅުދޫ، މާފަރުގެ ރައްޔިތުންނަށް ވަރަށް ޚާއްސަ ޝުކުރެއް ދަންނަވާކަމަށެވެ.
ހަ ސަތޭކަ އަށް ވުރެ ގިނަ ކުދިން ބައިވެރިވުމަށް އެސްއެމްއެސް ފޮނުވި މި މުބާރާތުގެ އޮޑިޝަނުން ސްޓޭޖާ ހަމައަށް އައި ފަނަރަ ކުދިންނާއި ވާދަކޮށްގެން ޚާލިދު އެއްވަނަ ހާސިލް ކުރީ ސ. ފޭދޫ އިބްރާހީމް ސައީދު (އިއްބެ) ބަލިކުރުމަށްފަހުއެވެ.
No comments:
Post a Comment