ދައުލަތުގެ މީޑިޔާ މިނިވަންކުރުމަށް ގޮވާލާ ޑީއާރުޕީގެ މެންބަރުން އެމްއެންބީސީ ކުރިމަތީ މުޒާހަރާކޮށްފި 01 ފެބްރުއަރީ، 2011

ދައުލަތުގެ މީޑިޔާ މިނިވަންކުރުމަށް ގޮވާލާ އިދިކޮޅު ޑީއާރުޕީގެ ޑެޕިއުޓީ ލީޑަރ އިލްހާމް އަހުމަދާއި ޒުވާނުންގެ ގޮފީގެ ރައީސް އަހުމަދު މަހްލޫފްގެ އިތުރުން ޕާޓީގެ ކައުންސިލްގައި ހިމެނޭ ބައެއް ފަރާތްތަށް އިސްވެ ތިއްބަވައިގެން އެޕާޓީގެ ބައެއް މެންބަރުން ރޭ އެމްއެންބީސީ ކުރިމަތީ މުޒާހަރާކޮށްފިއެވެ.

9:30 ހާއިރު އެމްއެންބީސީ ކުރިމައްޗަށް މުޒާހަރާއަށް އެއްވި މީހުން ބުނަމުންދިޔައީ ދައުލަތުގެ މީޑިޔާ މިނިވަންކޮށް، ހަމަހަމަކަމާއެކު އެންމެންނަށް ފުރުސަތު ދިނުމަށާއި، ސަރުކާރު ހިންގާ ޕާޓީއަށް ނިސްބަތްވާ ކެންޑިޑޭޓުންނަށް ކެމްޕެއިން ނުކުރުމަށެވެ.

އަދި އެމްއެންބީސީން ގެނެސްދޭން ޖެހޭނީ ހަމައެކަނި ރައީސުލްޖުމްހޫރިއްޔާ މުހައްމަދު ނަޝީދާއި، އެމަނިކުފާނުގެ ޕާޓީން ހިންގާ ކަންތައްތައް އެކަނި ނޫންކަމަށާއި، ހުރިހާ ޕާޓީތަކަށްވެސް ކެމްޕެއިން ކޮށްދެން ޖެހޭނެކަމަށެވެ. އަދި ދައުލަތުގެ މީޑިޔާ މިނިވަންކުރުމަށް ގޮވާލާ ކުރީގެ ސަރުކާރުން މީޑިޔާ ނަހަމަ ގޮތުގައި ބޭނުންކުރާކަމަށްބުނެ، އަޑުއުފުލި މީހުން މިއަދު މީޑި ހިސޯރުކޮށްގެން ތިބޭކަމަށްވެސް ބައިވެރިން ގޮވަމުން ދިޔައެވެ. މީގެއިތުރުން އެމްއެންބީސީގެ ބޯޑް މެންބަރުންގެ އިސްތިއުފާއަށްވެސް ރޭވަނީ ގޮވާލާފައެވެ.

މުޒާހަރާގެ ބައިވެރިން އަޑުގަދަކުރަންފެށުމުން އެމްޑީޕީ ހަރުގޭގައި ތިބި އެމްޑީޕީގެ މެންބަރުން އެސަރަހައްދަށް އެއްވެ، މުޒާހަރާގެ ބައިވެރިންނަށް ބަހުގެ ހަމަލާތައް ދެމުންދިޔައެވެ. އެއްބަޔަކު މިސަރުކާރަށާއި، ރައީސް ނަޝީދަށް ފާޑުކިޔަމުންދާއިރު، އެމްޑީޕީގެ މެންބަރުން ދިޔައީ ކުރީގެ ރައީސް މައުމޫނަށް ފާޑުކިޔަމުންނެވެ.

ޑީއާރުޕީގެ ޑެޕިއުޓީ ލީޑަރ އިލްހާމް އަހުމަދު ވިދާޅުވީ މި މުޒާހަރާއަކީ ސުލްހަވެރި މުޒާހަރާއެއް ކަމަށާއި، މިއީ ދައުލަތުގެ މީޑިޔާ މިނިވަންކުރުމަށް ގޮވާލާ ކުރަމުންދާ މަސައްކަތުގެ ފެށުންކަމަށެވެ. އަދި އެމްއެންބީސީން ދައުލަތުގެ މީޑިޔާ ހިސޯރުކޮށްގެން ސަރުކާރު ޕްރޮމޯޓް ކުރުމަށްކުރަމުންދާ މަސައްކަތް ވަގުތުން ހުއްޓާލުމަށް ވެސް އިލްހާމްގޮވާލިއެވެ.

މިމުޒާހަރާ ރާވާ އިންތިޒާމްކުރުމުގައި އިސްކޮށް ހަރަކާތްތެރިވެ ވަޑައިގަންނަވާ، ޑީއާރުޕީގެ ޒުވާނުންގެ ގޮފީގެ ރައީސް، ގަލޮޅުދެކުނު ދާއިރާގެ މެންބަރ އަހުމަދު މަހްލޫފް މިއަދު ނޫހަށް މައުލޫމާތު ދެއްވަމުން  ވިދާޅުވީ މިސަރުކާރުން ދައުލަތުގެ މީޑިޔާ ގާނޫނާއި ޚިލާފަށް ހިސޯރުކޮށްގެން ހަމައެކަނި އެމްޑީޕީގެ މެންބަރުންނަށް ކެމްޕެއިން ކުރަމުންދާ ދިއުން ހުއްޓާލައި، ހަމަހަމަ ފުރުސަތުތަކެއް ގާއިމްކޮށް ދެއްވުމަށް ރައީސް ނަޝީދަށް ގޮވާލާކަމަށެވެ.

އަދި މިނިވަން މީޑިޔާއަށް އޮތް ފުރުސަތު ބަންދުކުރަމުން ގެންދިއުމާއި، މިނިވަން ނޫސްވެރިންނަށް އަނިޔާކޮށް ބިރުދައްކަމުން ގެންދިއުމާއި ދެކޮޅަށް ކުރަމުންދާ މުޒާހަރާގެ އަޑު ރައީސް ނަޝީދުގެ ކަންފަތްފުޅަށް އަރުވަން ބޭނުންވާ ކަމަށް މަހްލޫފް ވިދާޅުވިއެވެ.

އަދި މި މުޒާހަރާ އިންތިޒާމްކޮށް އިސްވެ ހަރަކާތްތެރިވަނީ މަހްލޫފްގެ އިތުރުން ޑެޕިއުޓީ ލީޑަރ އިލްހާމް އަހުމަދާއި، ވައިކަރަދޫ ދާއިރާގެ މެންބަރ އަލީ އާރިފްއާއި، ވިލިމާފަންނު ދާއިރާގެ މެންބަރ އަހުމަދު ނިހާންއާއި ނިލަންދޫ ދާއިރާގެ މެންބަރ އަބްދުލް މުހުސިންއާއި، ޑެޕިއުޓީ ލީޑަރުކަމުން ވަކިކޮށްފައިވާ އުމަރު ނަސީރާއި، ކުރީގެ ރައީސް މައުމޫންގެ ތަރުޖަމާނު މުހައްމަދު ހުސެއިން ޝަރީފެވެ.

އެހެންނަމަވެސް ޑީއާރުޕީގެ ޒަޢީމްގެ ފްރެކްޝަނުން ކުރާ މުޒާހަރާތަކާ އަޅާބަލާއިރު ރޭގެ މުޒާހަރާގައި މީހުން މަދުކަން ފާހަގަކުރެވެއެވެ. އަދި މި ފެރެކްޝަނުން ދައުލަތުގެ މީޑިޔާ މިނިވަންކުމަށް ގޮވަމުންދާއިރު ޑީއާރުޕީއިންވަނީ އެމްއެންބީސީ ބޮއިކޮޓްކޮށްފައެވެ.

މުޒާހަރާ ނިމިގެން ދިޔައީ އުމަރު ނަސީރާއި މުޒާހަރާގައި އިސްކޮށްތިއްބެވި ބޭފުޅުން މަގުމަތީގައި ނެށްޓެވުމާއި މުނިފޫހިފިލުވުމުގެ ހަރާކާތަކަށްފަހު އެވެ.