ދެމެހެއްޓެނިވި ގޮތުގައި ރަށްރަށް ތަރައްޤީ ކުރެވޭނީ، ތަރައްޤީގައި ރައްޔިތުންގެ ބައިވެރިވުން ލިބިގެން: ރައީސް 01  ފެބްރުއަރީ، 2011

ދެމެހެއްޓެނިވި ގޮތުގައި ރާއްޖެއާއި ރާއްޖޭގެ ރަށްރަށް ތަރައްޤީ ކުރެވޭނީ، ތަރައްޤީގައި ރައްޔިތުންގެ ބައިވެރިވުން ލިބިގެން ކަމުގައި ރައީސުލްޖުމްހޫރިއްޔާ މުޙަންމަދު ނަޝީދު ވިދާޅުވެއްޖެއެވެ.

ރައީސް ނަޝީދު މިހެން ވިދާޅުވީ، އިއްޔެ ކޮޅުމަޑުލު ވިލުފުށްޓަށް ވަޑައިގެން، އެ ރަށުގެ ރައްޔިތުންނާ ބައްދަލުކުރައްވައި ވާހަކަފުޅު ދައްކަވަމުންނެވެ.

ރައީސްގެ ވާހަކަފުޅުގައި ރާއްޖޭގެ ތަރައްޤީއަށްޓަކައި، ކުރިއަށް އޮތް ލޯކަލް ކައުންސިލްތަކުގެ އިންތިޚާބާއި، އެ އިންތިޚާބާ ގުޅިގެން އުފެދޭނެ ލޯކަލް ކައުންސިލްތަކުގެ މުހިންމު ކަމުގެ މައްޗަށް ބައްލަވާ ލައްވަމުން ވިދާޅުވީ ރަށު ކައުންސިލް އުފެދި، ރަށުގެ ރައްޔިތުންނަށް ވާންވީގޮތް އެނގިގެން، އެރައްޔިތުންގެ ބައިވެރިވުމާއެކީގައި ކަންކަން ނިންމީމާ ނޫނީ، ދެމެހެއްޓެނިވި ގޮތުގައި ކަންކަން ނިމިގެން ނުދާނެ ކަމަށެވެ.

ރައީސް، ވިލުފުށީގައި ދެއްކެވި ވާހަކަފުޅުގައި، ރާއްޖޭގެ ރައްޔިތުންނަށް އަތްފޯރާ ފަށުގައި ބޯހިޔާވަހިކަން ހޯއްދަވައިދެއްވުމުގެ ވަޢުދުގެ މައްޗަށް އަލިއަޅުއްވާލެއްވިއެވެ. އަދި ގޯތިގެދޮރާއި، ބޯހިޔާވަހިކަން މަދު މީހުންނަށް، ކުރިއަށް އޮތް ތިން އަހަރުގެ ތެރޭގައި ސަރުކާރުން ބޯހިޔާވަހިކަން ހޯއްދަވައިދެއްވާނެ ކަމަށާއި، މި ސަރުކާރު އުފެދިފައިމިވާނީ ރައްޔިތުންނަށް ބޯހިޔާވަހިކަން ހޯއްދަވައިދެއްވުމަށް ވަޢުދުވެވަޑައިގެން ކަމުގައި ވިދާޅުވިއެވެ.

މި ރޮނގުން ވާހަކަފުޅު ދައްކަވަމުން، ސުނާމީއާ ގުޅިގެން އަޅާ ގެދޮރާއި، ރައްޔިތުންނަށް ބޯހިޔާވަހިކަން ހޯއްދަވައިދެއްވުމަށް ސަރުކާރުން އަޅުއްވާ ގެތަކުގެ ތެރެއިން ވިލުފުށީގައި އެޅުއްވުމަށް ހަމަޖައްސަވާފައިވާ ގެތައް މި އަހަރު އަޅުއްވާނެ ކަމުގައި ވެސް ރައީސް  ވިދާޅުވިއެވެ.

ވިލުފުށްޓަކީ 2004 ވަނަ އަހަރުގެ ސުނާމީގައި ރާއްޖެއިން އެންމެ ބޮޑަށް ގެއްލުންވި އެއް ރަށް ކަން ފާހަގަކުރައްވައި ވިލުފުށީގެ ތަރައްޤީއަށް ސަރުކާރުން ރާއްވަވާފައިވާ ޕްރޮގްރާމްތަކުގެ މައްޗަށް ބައްލަވާލައްވަމުން، މިއަހަރުގެ ތެރޭގައި، ވިލުފުށީގައި ޓެލެމެޑިސިންގެ ޚިދުމަތް ޤާއިމް ކުރައްވާނެ ކަމުގައި ރައީސް ނަޝީދު ވިދާޅުވިއެވެ. އަދި، ވިލުފުށީގައި ވިޔަފާރިއަށް މަގުފަހި ކޮށްދޭނެ ރަނގަޅު ބަނދަރުމައްޗެއް ތަރައްޤީ ކުރެއްވުމަށް ސަރުކާރުން ޕްރޮގްރާމެއް އެކުލަވާލައްވަމުން ގެންދަވާ ކަމަށް ވިދާޅުވެ، އެ ޕްރޮގްރާމްތައް ތަންފީޒު ކުރެއްވުމަށް ބޭނުންވާ ފައިސާ، މިއަހަރުގެ ބަޖެޓްގައި ހިމެނިފައިވާކމަށް ރައީސް ވިދާޅުވިއެވެ. ރަށުގެ ކައުންސިލް އިންތިޚާބު ވުމުން، ކައުންސިލްގެ މަޝްވަރާއާއެކު، މި ޕްރޮގްރާމްތައް ފެށްޓެވުމުގެ ހުރިހާ ކަމެއް ފަހިވެފައިވާ ކަމުގައި ވެސް ރައީސް ނަޝީދު ވިދާޅުވިއެވެ.

ރައީސް، ވިލުފުށްޓަށް ކުރެއްވި ދަތުރުފުޅު ނިންމަވާލެއްވުމަށްފަހު، އިއްޔެ މެންދުރުފަހު، ކޮޅުމަޑުލު ގާދިއްފުށްޓަށްވެސް ވަޑައިގެންނެވިއެވެ. އެމަނިކުފާނު ގާދިއްފުށީ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައި، ގާދިއްފުށްޓަކީ މީސްކޮޅު މަދުރަށެއް ކަމުގައިވިޔަސް، ސަރުކާރުން އެރަށް ދޫކޮށް ނުލައްވާނެ ކަމުގައި ވިދާޅުވިއެވެ. އަދި ގާދިއްފުށީގައި ރަނގަޅަށް އާބާދުވެވޭނެ ޕްރޮގްރާމެއް ހިންގެވުމުގެ މަސައްކަތް ސަރުކާރުން ކުރައްވަމުން ގެންދަވާ ކަމުގައިވެސް ވިދާޅުވިއެވެ.

2011 ވަނަ އަހަރުގެ ބަޖެޓުގައި ހިމެނޭ ޕްރޮގްރާމްތަކުގެ މަޢްލޫމާތު ދެއްވުމަށާއި، ރަށްރަށުގެ ތަރައްޤީއަށް ސަރުކާރުން ހިންގަވަމުން ގެންދަވާ އަދި ހިންގަވަން ރާއްވަވާފައިވާ މަޝްރޫޢުތަކުގެ މަޢްލޫމާތު، އަތޮޅުތަކުގެ ރައްޔިތުންނާ ޙިއްޞާ ކުރެއްވުމަށް ރައީސް ނަޝީދު، ރާއްޖޭގެ އަތޮޅުތަކަށް ކުރައްވަމުން ގެންދަވާ ދަތުރުފުޅުގެ ތެރެއިން، ނިލަންދެއަތޮޅު އުތުރުބުރިއާއި އެއަތޮޅު ދެކުނުބުރި އަދި ކޮޅުމަޑުލުގެ ބައެއް ރަށްރަށަށް ކުރެއްވި ދަތުރުފުޅު ނިންމަވާލެއްވުމަށްފަހު ރޭ އިރާކޮޅު ވަނީ މާލެވަޑައިގެންފައެވެ.