ދައުލަތުގެ މީޑިއާއެއް އޮންނަ ކަމުގައިވަނީނަމަ، ޤައުމިއްޔަތާއި ދައުލަތް ބިނާކުރުމަކީ، އެ މީޑިއާގެ އެއް ވާޖިބު: ރައީސް 02 ފެބްރުއަރީ، 2011

ދައުލަތުގެ މީޑިއާއެއް އޮންނަ ކަމުގައިވަނީނަމަ، ޤައުމިއްޔަތާއި ދައުލަތް ބިނާކުރުމަކީ، އެ މީޑިއާގެ އެއް ވާޖިބުކމަށް ރައީސުލްޖުމްހޫރިއްޔާ މުޙަންމަދު ނަޝީދު ވިދާޅުވެއްޖެއެވެ.

ރައީސް ނަޝީދު މިމޭރުމުން ވާހަކަފުޅުދެއްކެވީ ކީރިތި ޤުރްއާނުގެ ދިވެހި ތަރުޖަމާ، އެމް.އެން.ބީ.ސީ. ވަން އިން ގެނެސްދިނުން، އިފްތިތާޙުކޮށްދެއްވުމަށް ރައީސުލްޖުމްހުރިއްޔާގެ އޮފީހުގައި އިއްޔެ ހެނދުނު ބޭއްވި ޚާއްޞަ ރަސްމިއްޔާތުގައެވެ.

މި ރަސްމިއްޔާތުގައި ރައީސް ނަޝީދު ދެއްކެވި ވާހަކަފުޅުގައި، ކީރިތި ޤުރްއާނުގެ ދިވެހި ތަރުޖަމާ، ގަވާއިދުން އެމް.އެން.ބީ.ސީ އިން ފޮނުވޭނެ ގޮތަށް ހަމަޖެހިގެންދިޔަ ކަމަށްޓަކައި ވަރަށް އުފާފުޅު ކުރައްވާ ކަމަށް ވިދާޅުވިއެވެ.

އިސްލާމްދީނުގެ ކުރިއެރުމަށްޓަކައި މިނިވަންކަމަކީ ކޮންމެހެން ބޭނުންތެރި ކަމެއްކަން  ބަޔާންކުރައްވައި، އިސްލާމީ ރަނގަޅު ޢަޤީދާއެއް އަޅުގަނޑުމެންގެ ހިތްތަކުގައި ބިންވަޅު ނެގުމަށްޓަކައި، ޚިޔާލުފާޅުކުރުމުގެ މިނިވަންކަމަކީ، ކޮންމެހެން ބޭނުންތެރި ކަމެއް ކަމުގައި ރައީސް ނަޝީދު ވިދާޅުވިއެވެ.

އަދި މިއަދު އަޅުގަނޑުމެން ބިނާކުރަމުން މިގެންދަނީ، އެޤައުމިއްޔަތު ކަމަށާއި، އެޤައުމިއްޔަތަކީ ޖީލަކުން އެއްފަހަރުވެސް، ޤަރުނަކުން އެއްފަހަރުވެސް ރައްޔިތަކަށް ބިނާކުރަން ނުލިބޭނެ ފުރްޞަތެއް ލިބި ތިބެގެން، ބިނާކުރަމުންދާ ޤައުމިއްޔަތެއް ކަމުގައި ވިދާޅުވިއެވެ.
ރައީސްގެ ވާހަކަފުޅުގައި، ޤައުމިއްޔަތެއް ބިނާކުރުމުގައި ކޮންމެހެން ބޭނުންވާ މައިގަނޑު އަސާސްތަކެއް އެބަހުރި ކަމުގައި ވިދާޅުވިއެވެ. އަދި ރާއްޖޭގެ ޤައުމިއްޔަތު ބިނާކުރެއްވުމަކީ، މިހާރު ކުރިއަށް ގެންދަވާ އެންމެބޮޑު މަޝްރޫޢު ކަމަށާއި، އެ ޤައުމިއްޔަތު ބިނާކުރައްވަމުން ގެންދަވަނީ، މާތްވެގެންވާ އިސްލާމްދީނާއި، އިންސާނީ ޙައްޤާއި، އަދި ރާއްޖޭގެ ޘަގާފަތު، އެއީ އަސާސްތަކެއް ކަމަށް ދެކެވަޑައިގެން ކަމުގައި ވެސް ރައީސް ނަޝީދު ވިދާޅުވިއެވެ.

ރައީސް ނަޝިދު ވިދާޅުވީ “މިއަދުގެ ދިވެހިރާއްޖެ، މިއަދުގެ ދިވެހިން އެދެނީ މުޅިން އެހެން ޤައުމިއްޔަތެއް އަލުން މި ރާއްޖޭގައި ފައްކާވުމަށް. އަޅުގަނޑުމެންގެ ޒުވާނުންނާއި، މެދު ޢުމުރާއި އަދި ދޮށީ ޢުމުރުގެ އެންމެ ރައްޔިތުން އެދި ގޮވަނީ، ރާއްޖެ އަލުން އަނބުރާ ބިނާކުރުމަށް. މި ރާއްޖެއަކީ ކޮބައިކަން އަޅުގަނޑުމެންނަށް، އަޅުގަނޑުމެންގެ ޒުވާނުންނަށް، އަޅުގަނޑުމެންގެ ރައްޔިތުންނަށް އެނގުމަށް. އަދި އަޅުގަނޑުމެންގެ މުސްތަޤްބަލް ފެންނާނީ ކޮންގޮތަކަށްތޯ، އެ މަންޒަރުވެސް އެ ރައްޔިތުންނަށް ސިފަވުމަށް.” ކަމަށެވެ.

” ރާއްޖޭގައި ދިވެހިން އިސްލާމްދީނަށް އުޅެމުން އަންނަތާ އެތައް ސަތޭކަ އަހަރެއްވެއްޖެ. އިބްނުޢަރަބީ މަސްޢޫދީ އަދި ފަހުން އައިސް އިބްނި ބަޠޫޠާ، ދިވެހިރާއްޖެއާ ގުޅޭގޮތުން ލިޔުއްވާފައިހުރި ލިޔުންތައް ނުހަނު ގިނަ. ރާއްޖޭގެ އިސްލާމީ ޘަޤާފަތަކީ، އިސްލާމީ ތާރީޚަކީ، ދުނިޔޭގެ މަދު އިސްލާމީ ޤައުމަކުން ނޫނިއްޔާ ފެންނާން ނެތްފަދަ ވަރުގަދަ އިސްލާމީ ޘަޤާފަތެއް، އިސްލާމީ ތާރީޚެއް. މި ރާއްޖޭގެ ރަސްކަލުންގެ ލިސްޓެކޭ، މި ރާއްޖޭގެ ފަނޑިޔާރުންގެ ލިސްޓެކޭ ދާދި އެއްހަމަ. ރާއްޖޭގައި ޒަމާނުއްސުރެ ފަށައިގެން، ދީނީ ހެޔޮލަފާ ނަޞޭޙަތް ދިނުމާއި، ދީނީ ވަޢުޡު ބުނުމާއި، ދީނީ ހަމަތައް ރައްޔިތުންނަށް އަންގައިދިނުމުގައި، ފަނޑިޔާރު މަނިކުފާނާއި އަދި އެހެންވެސް ދައުލަތުގެ ވެރިކަމުގެ މުއައްސަސާތައް ކުރަމުން އައި މަސައްކަތްތައް ނުހަނު ގިނަގުނަ” ކަމަށްވެސް ރައީސް ނަޝިދު ވިދާޅޅުވިއެވެ.

ކީރިތި ޤުރްއާންގެ ދިވެހި ތަރުޖަމާ، އެމް.އެން.ބީ.ސީ. ވަން އިން ގެނެސްދެއްވުން، ފަށްޓަވައިދެއްވުމުގެ ރަސްމިއްޔާތުގައި، މަރްޙަބާ ދެންނެވުމުގެ ގޮތުންނާއި، ތަޢާރުފެއް ދެއްވުމުގެ ގޮތުން ވާހަކަ ދެއްކެވީ، އެމް.އެން.ބީ.ސީ.ގެ މެނެޖިންގ ޑިރެކްޓަރ އިބްރާހީމް ޚަލީލެވެ. މި ދިވެހި ތަރުޖަމާގެ އަޑު އަޅުއްވައި ދެއްވާފައިވަނީ، އެމް.އެން.ބީ.ސީ. ވަންގެ ޗީފް އޮޕަރޭޓިންގ އޮފިސަރ މުޙަންމަދު ޢާޞިފެވެ. މިރަސްމިއްޔާތުގައި އޭނާވެސް ވާހަކަ ދެއްކެވިއެވެ. އަދި ތަރުޖަމާ ރެކޯޑު ކުރުމަށް ކުރެވޭ މަސައްކަތް ދައްކައިދޭ ވީޑިއޯ ރިޕޯޓެއްވެސް ދެއްކުން އޮތެވެ.